Exo 12 | TVK | STEP | Melele xa Mosis xal Eron ludi tamu e hal Isip, Iahova misepin mi xalu bit,

Exodus 12

Hi Mitavi e Horam Muimol Xil na Mol-Isrel Xil

Eksodas 12:1-17, 29-33

1 Melele xa Mosis xal Eron ludi tamu e hal Isip, Iahova misepin mi xalu bit, 2 “E alminit namim, aveti ak mei ihe aveti kokot te huram xil xa ti imei. 3 Mulhit mesen sepinien ak mi mol-Isrel xil vus mulhit, 'E melengien xa ihe he xalu (10) te aveti ak, moletin xil vus liling xat sipsip mu nani tei tengan lia ni e tim sae xil. 4 E xosxa ngan xil xa ladi tim tei lipusi xa lasakras lava vuol ni sipsip tei, ma likila liseti hisi teni mi ngan xil xa ladi sangas visal xil. Xil liseti ipin mi moletin xil xa lia ni. 5 Muleh hisit sipsip mu nani xil xa imak: ngan xil xa huram nae ihe tei takes, lihe malohos, e neta ti naxui xil. 6 Mulaxat xil e tim samim ituxoh melengien xa ihe hat e le tei (14) te aveti ak. Ti, melele xa ut imaluxoluk, xamim vus xa mube mol-Isrel xil mumei vituei e muhas vin vongoro xil ak. 7 Melele xa moletin tei ihas vin vongoro san ivus, ipoe itel ti ren e itilomun ihe von anien en e tim san. Ti, ihili ren e pos xalu te puiteh e ngan mun xa morxoteh ut nesao. 8 E vongien nen ak, moletin itin hisi te vongoro an tang e ia ni itel uvei xil xa mikon e beret xa is tovuol en. ^{▼▼12:8 Mol-Isrel xil lian anien ak imak ixoni ngan xa ladi e suse e lathur ti melele xa pipin tengan lavapol kuhi ni.} Mol-Isrel xil lianien ixoni ngan taxa lehit di tuei lakakao usil suse. 9 Munaxa ti hisi xa tameses ti mu ngan xa lakuk ni e oei. E mutin ni kestang itel vatin, len xil e tinen xil vus xa bos te anien en. 10 Munaxa ling ti rute nati natuxoh makoe. E xosxa rut hisi ti di, mutin lelen ni. 11 Melele xa mua anien ak, mupol ni ixoni ngan taxa lehit di tuei mukakao usil suse namim: musing ni eising xil te kakaoen, muhes xat sandel namim, muleh xat eitingil namim, e muanien tatou. Anien te Tavien ak mei ihe anien eo te merereen iha mi Iahova.

12 “E vongien ak, inou xa be Iahova, nika pas ut xil vus e hal Isip, e nihas vin horam muimol xil itel muimol na vongoro sae xil mun. Reitin, ixo sexien ak, inou nilepis hi xil xa mol-Isip xil di lamot mi xil e nisa pangasien mi xil. 13 E melele xa nimei e nipus ra xa ite pos te puiteh, ngan ak ipisen ni xa moletin navan xil ladi nim ak, ma nitavi ra xil e ninasa pangasien ti napurun xil naxoni ngan ti xa nisa ni mi mol-Isip xil.

14 “Melengien ak, ti munem xati vehakut e mupol ni mei ihe melengien eo tei. Mupol ni anien ven e huram xil xa ti imei tengan munem xat rilomun ni holesok xil xa inou, Iahova, natepol ni.”

15 Hi biteni mun bit, “Melengien ihe lu e he sav (7), munaxa ti beret xa is di en. Mua kes ni beret xa mahin tang. E melengien kokot teni, xamim muleh rerat vuol ni is xil ra tim samim xil. Muso ni iha, vengan xa xosxa moletin tei ia beret xa is da en e melengien xil ak, ma musil rati ra xamim tengan xi nave ngan Isrel ti mun. 16 E melengien kokot itel melengien kor te melengien xil ak, xamim mumei vituei e mumot minou. Moletin xil linapol ti, e mikila lisak xat anien kestang. 17 E huram xil ngasen xa ti imei, ti munem xat anien te beret xa is tovuol en tengan mupisen ni mi horamue namim xil vengan xa, e melengien ak vari iaxa nateleh rerat xamim ra hal Isip.”

29 Di, e melengien xati teni, e hilaep te vongien, Iahova bemei e tan, e bas vuol ni horam muimol xil vus na mol-Isip xil: ngan na suv toto xa di dotan e voninen te xeihen, ba duxoh movotei xil mun xa ladi e nim te xeih. E muimol te vongoro sae xil mun lalel. 30 E vongien nen tak, suv toto, eilep nan xil, del moletin xil vus tahal Isip latamea e lapusi xa horam muimol nae xil vus lalel. Ma tangen tei xa eilep mistal e ut xil vus e hal Isip. 31 E vongien nen tak, suv toto misilasil ve Mosis xal Eron. E melele xa lumei, biteni mi xalu bit, “!Muhe reling nou! !Xamil itel mol-Isrel xil vus! !Muhe reling moletin navan xil e kantri navan mun! !Ha mumot mi Iahova ixoni ngan xa mutesis nou ni! 32 !Sipsip, nani e vongoro samim xil vus, muleh xil e muha! E melele xa ti mumot mi Hi namim, musisi tengan ituxol xat inou li mun.”

33 Mol-Isip xil vus ladak kes xil tengan lave reling xil katen e labiteni mi xil labit, “Xamem vus mulel xosxa xamim munava ti.”

Mol-Isrel Xil Labe Reling Hal Isip e Hi Misa Kokot ni Rae Nan Xil mi Xil

Eksodas 12:37-40, 43-47; 13:1-2, 11-16, 20-21

37 Mol-Isip xil lamea reling taon tahal Rameses xa de hal Isip, e lakakao laba laduxoh metimal tahal Sakot. Xil labe holu xa labe holu pupu: tiramue xil tamu laduxoh handred taosen tei e he sav (600,000), e ngan ak, latavuli atou xil ti del tututen xil. 38 E moletin holu mun xa latehusil xil, latave ngan Isrel xati ti. E moletin xil ladel sipsip, nani e vongoro sae xil mun xa labe holu pupu. 39 Xil langgul xat beret xa is tovuol en ni pulaoa xa latehilesi ngamu teti e hal Isip. Vengan xa mol-Isip xil latexeih xat xil tengan lave reling xil, ma xil latetemanon e latnahur ti mesal tengan lasotil pulaoa vakaio mu lasak mesen ti anien ae xil vahe te suse. 40 Melele xa mol-Isrel xil latemei kokot e tan tahal Isip ba tetuxoh melele xa latehe relingi, huram tehe handred hat hanutap tei e he xalu mun (430).

43 Di, Hi biteni mi Mosis xal Eron bit, “Ngan ak be rae xil te Anien te Tavien: moletin xil te kantri sav xil lasakras lava ni. 44 E slev namim xil xa mubas xil mei labe vexaho, xil lakila lava ni. 45 Moletin xil xa lamei te melengien vahis tang, mu lamei tengan lapol aveti vahis, xil lasakras lava ni. 46 Anien xil vus ak, mua ni e nim xa mupol xat anien ak en. E vongoro xil xa mutin ni, munalehi ti nave hale mu munavul si xil ti. ^b 47 Usil sexien xil ak, xamim mol-Isrel xil ngasen mei mupol ni anien ak.”